Teritori

Ła Serenisima Republica de Venesia, ciamà anca Republica de San Marco, xe el nome originario de un stato antico, indipendente e fra i pì longevi deła storia.

Nasse intorno al 697 d.c. in te łe xone maritime dełe atuałi rejion Veneto e Friuli, sol teritorio de l 'Impero Bixantin de alora. Dopo diverse guere fra łe popołasiòn deł Regno Longobardo, Impero Roman e Impero Bixantin, nasse el Ducato de Venesia. Se crea forme de comercio adate ała xona, come ła pesca, łaorasiòn del vèro e estrasiòn del sałe. Dal 700 d.c. fin al 1700 se susegue tanti eventi storici e bełici, ma ła Republica de Venesia rexiste pi o meno co dei confini ben definìi ke atualmente sarìa ła rejon Veneto par ła majior parte, Friuli Venesia Giulia, Trentin Alto Adaxe, łe province de Bergamo e Bressa, Istria e Dalmasia. Cueło che par noaltri xe inportante xe stabiłire cuałi che xe i teritori veneti de cui riapropriarse, difati ciapemo in considerasiòn i teritori veneti prima de ła so ocupasiòn.

Cartina dei Teritori Veneti

 L'ocupasiòn scumisia infati in tel 1797, co łe trupe de Napoleon Bonaparte durante ła campagna d'Italia. Numaroxi i scontri, fra i cuai se ricorda speso łe Pascue Veronexi, osìa cuando i veronexi se ribeła ałe trupe francexi che invadea e derubava el so teritorio. A majo del 1797 el Doge Manin e i majistrati depone łe so carike e el Major Consijio abdica dikiarando ła Republica decadua. Da ke l'ano lì nasse el Regno Longobardo soto łe man de i austriaci fin al 1866 circa, cuando avien el famoxo plebisito par l'anesiòn a l'Italia. Tanti proclama el referendum ilegitimo, parké no sarìa sta votà in maniera democratica (skede xa conpiłà, espresiòn de voto co łe Forse Armate davanti l'urna, 2 urne separà del sì e del no, ecc...), ma de fato ła Republica xe decadua uficialmente in tel 1797 e xe cuei i teritori i cuai noaltri vołemo far fede, cuei deła splendida Republica de San Marco!